programación redondela en curtoE faino mañá mesmo no Multiusos da Xunqueira cunha sección Andaina cada un dos días de proxección.  Mellor non podía comezar a colaboración da nosa asociación coa organización deste festival redondelán, de ámbito nacional, que nesta edición conta coa participación de máis de 600! curtas.  Dentro del haberá un espazo adicado a obras audiovisuais centradas na atención á diversidade e á inclusión social da non sei se ben chamada (supoño que non) discapacidade.

Eu, que tiven a sorte de ver xa as curtas que se van proxectar nesa sección, anímovos a que non faltedes no apoio a unha cita que é xa referencia no panorama cultural galego e alén.

Non teño máis que palabras de agradecemento a todas e a todos no festival, en especial para o seu director, Francisco Carreira.

Premendo na imaxe da esquerda accededes a toda a programación.

Tempo agora para a aportación de Sebastián Pérez, o segundo alumno en gravar as súas variacións sobre o valse das Bizocas, dentro da serie Crea Clips do Obradoiro Músicasbarxas.

As de Sebastián son as dun chaval sen máis estudos musicais que os recibidos en primaria (exiguos), que ademáis non tivo música en primeiro da secundaria, polo que, na práctica, é case coma se comezara de novo.  Por iso hai que darlle todo o valor que merece o seu traballo; catro variacións para frauta de bico, a súa de plástico de dixitación alemana, nas que sorprende, especialmente na segunda, pola súa natural capacidade para deixar que a música respire en todas e en cada unha das notas.

Parabéns Sebas, outro dez!

andaina debuxo def

Que contentos estamos os da Asociación Andaina de familias de nenas e nenos con necesidades educativas especiais, nada menos que 250 foron os orixinais que hoxe mesmiño tivemos nas mans os do xurado deste certame de debuxo, que pretende educar na diversidade ao alumnado de primaria do concello de Redondela e limítrofes.

Abraiados pola cantidade mais tamén pola calidade dos traballos presentados e agradecidos aos centros participantes; ao Ceip Alexandre Bóveda, ao Colegio Vigo, ao Cep Santa Mariña e ao Ceip Outeiro das Penas, e moi especialmente aos futuros médicos, electricistas, coidadores, mestras, mestres  e compañeiros dos nosos fillos, que amosaron sensibilidade e talento a partes iguais.

O premio farase público o vindeiro 28 de abril, nun acto a celebrar no Multiusos de Redondela.

Xa de volta de Santiago, da ponencia que presentamos na I Xornada do Proxecto Abalar os do Audiovisual As Barxas, déixovos como mostra a presentación (con mini video incluído) da miña parte, a que corresponde á parte musical da nosa iniciativa.  Grazas outra vez aos asistentes, por ter elexido a nosa experiencia de entre as tres que simultáneamente estábanse celebrando. Prometemos seguir e seguir e seguir.

Para realizala empreguei Keynote, o software equivalente a Powerpoint de Apple. Se queredes seguila ben recoméndovos que esteades atentos aos cambios de páxina e premades na pausa para non perder detalle.

Unha das cousas que reclama o noso alumnado con máis insistencia é presencia na rede.  Os nativos dixitais non teñen o dilema que temos os que non o somos sobre que existencia é máis auténtica, nin prexuízos sobre o plus de verdade do “real”.  Pensan que o real, o relevante, existe ou non con independencia do medio.  O certo é que non hai revolución tecnolóxica sen revolución na maneira de sentir e entender a realidade, e a realidade hoxe é que o interlocutor do noso alumnado, a súa audiencia, existe tamén na rede, co video viral como un dos vehículos máis importantes de interacción.  Os chavales queren ser virais, é dicir, participar en videos divertidos que teñan a maior difusión posible.  O que como docentes ten realmente interese é que poden ser unha ferramenta formidable para gañarmos o seu compromiso, nomeadamente, para fomentar o traballo en equipo, especialmente en aqueles grupos complicadiños.

O que tedes embaixo (un Harlem shake, a última moda entre os chavales) é o primeiro da nova serie do Obradoiro MúsicasbarxasQuero ser viral.

Do meu tempo no IES As Bizocas, no Grove, teño moitos momentos que van quedar xa para min para sempre.  Encontros, desencontros, alegrías, tristuras tamén unhas cantas, claro, e  chegar e ver o mar de Ons desde a ventá da miña aula. Increíble aquela vista, non coñezo moitas nin a metade de impresionantes.

Nunha mañá desas raras nas que o alumnado estaba de excursión ou así e ti tes unha desas horas libres, collín unha frauta e compuxen un valse de reollo da vista do mar, nun día gris como hai tantos.  O Valse das Bizocas, chameille; un sinxelo valse tradicional  que agochei nalgures e que deume por empregar agora co alumnado de 2º da ESO das Barxas, en Moaña, para un novo exercizo de composición dentro da serie Crea clips.

O que tedes embaixo é a primeira aportación, a de Hugo Pena, que compuxo nada menos que 5 variacións para piano, nas que xoga coa melodía con verdadeira inspiración.  Parabéns Hugo, isto é un 10, sen dúbida!

O vindeiro venres 19 de abril estarei coa miña compañeira do Audiovisual As Barxas, Luz Beloso,  no Pazo de congresos de Santiago de Compostela, na I Xornada de Coordinadores-as do proxecto Abalar, a plataforma das novas tecnoloxías da Consellería de Educación.

Estamos invitados a compartir as nosas experiencias coas TICS xunto con outros compañeiros implicados.  A xornada inclúe, ademáis, diversos relatorios e espazos para a reflexión, tedes o programa completo no documento que segue.

radio redondela

Seguimos recopilando o feedback recibido por A canción de Manuel, desta volta deixo a entrevista que a xornalista María Jesús Queimaliños me realizou en Radio Redondela, unha oportunidade para compartir e difundir información e a nosa experiencia co autismo do noso fillo, con especial atención á necesaria integración social, nomeadamente no ámbito da educación, e á atención sanitaria especializada que precisan as persoas como Manuel.

Moitas grazas pola oportunidade!

 

 

a canción de Manuel tvgTempo haberá para recapitular todo o feedback que un ano máis estamos recibindo a resultas de A canción de Manuel, un proxecto de concienciación do Transtorno do espectro autista, que a través do audiovisual levamos adiante a miña muller e máis eu, do que vos veño falando nos últimos días.

De entre as publicacións e entrevistas que estamos realizando deixamos agora a presentación que o mesmiño telexornal da televisión pública galega fixo na edición de hoxe.

Premendo na imaxe accededes ao video.  Aí andamos.

alí estarei 2

O 2 de abril é o día adicado á concienciación sobre o autismo, un transtorno (un espectro, en realidade) que afecta seriamente ao meu fillo Manuel.

Porque é preciso contribuír a que o futuro das persoas con esta condición sexa o mellor posible e porque  hai moito que facer para derrubar tópicos e comprometer á sociedade no coidado de quen máis o precisa, aportamos, miña muller Olga Lalín e máis eu, un novo video con canción; Alí estarei.

Difundide, por favor.